ແຜນດຳເນີນທຸລະກິດ ສະບັບປີ 2019-2021 ເປັນສະບັບທີ2 ສືບຕໍ່ສ້າງ ຈາກແຜນດຳເນີນທຸລະກິດ ສະບັບປີ 2013-2015. ຊື່ງໄດ້ຮັບການຊ່ວຍເຫຼືອແນະນໍາດ້ານເຕັກນິກວິຊາການ ເລີ້ມສ້າງກາງ ປີ 2018 ສໍາເລັດ ໃນທ້າຍປີ 2019.
ຂ້າພະເຈົ້າ ຜູ້ອໍານວຍການລັດນ້ຳປະປາແຂວງຈຳປາສັກຂໍສະແດງຄວາມຂອບໃຈມາຍັງກົມນ້ຳປະປາກະຊວງ ໂຍທາທິການ ແລະຂົນສົ່ງ, ພະແນກ ໂຍທາທິການ ແລະຂົນສົ່ງແຂວງຈໍາປາສັກ ທີ່ໄດ້ເອົາໃຈໃສ່ ນໍາພາສ້າງດ້ວຍຄວາມຮັບຜິດຊອບສູງ ເຮັດໃຫ້ປະສົບຜົນສໍາເລັດຢ່າງຄົບຖ້ວນ ແລະ ຮັບຮອງເອົາໄດ້ເປັນທາງການ. ອີກເທື່ອໜື່ງຂໍຂອບໃຈ ພະນັກງານຫຼັກແຫຼ່ງ ແລະ ວິຊາການ ຂອງລັດວິສາຫາກິດນໍ້າປະປາທັງໝົດ ທີ່ໄດ້ເຮັດໜ້າທີ່ຢ່າງຕັ້ງໜ້າ ສຸມທຸກສະຕິປັນຍາ ປະກອບສ່ວນຢ່າງເຂົ້າໃນການແຜນດຳເນີນທຸລະກິດດ້ວຍຄວາມຮັບຜິດຊອບ.
ແຜນດໍາເນີນທຸລະກິດ ປີ 2019-2021 ສະບັບນີ້ ໄດ້ສະແດງໃຫ້ເຫັນຢ່າງຊັດເຈນເຖິງປະສິດທິພາບ ຂອງການດໍາເນີນງານດ້ານເຕັກນິກ ທີ່ມີທ່າອ່ຽງໄປໃນທາງທີ່ດີຂື້ນ ລວມທັງປະສິດທິພາບ ຂອງການດໍາເນີນງານດ້ານການເງິນ ທີ່ບົ່ງບອກເຖິງຄວາມມີສະເຖຍລະພາບສູງ ແລະ ຈະມີເງື່ອນໄຂພຽງພໍ ໃນການບັນລຸໄດ້ການແກ້ໄຂບັນຫາວິກິດການດ້ານການເງິນສະເພາະໜ້າ ແລະ ຍາວນານ, ການຊໍາລະຕົ້ນທຶນ ແລະດອກເບ້ຍເງິນກູ້ຢືມໄດ້ໃນລະດັບດີສົມຄວນ; ເຖິງຢ່າງໃດກໍດີ ຍັງມີບາງກິດຈະກໍາ ທີ່ພວກເຮົາບໍ່ສາມາດບັນລຸໄດ້ ໃນຊ່ວງໄລຍະນີ້ ແຕ່ພວກເຮົາຈະສືບຕໍ່ກໍານົດເປັນກິດຈະກໍາປັບປຸງແກ້ໄຂ ສ້າງເປັນແຜນດໍາເນີນທຸລະກິດໃນຕໍ່ໜ້າໃຫ້ບັນລຸໄດ້ຢ່າງເປັນຮູບປະທໍາ.
ຂ້າພະເຈົ້າ ໃນນາມຜູ້ອໍານວຍການລັດວິສາຫະກິດ ຂໍຢືນຢັນວ່າ ຈະນໍາພາພະນັກງານຈັດຕັ້ງປະຕິບັດແຜນດັ່ງກ່າວໃຫ້ບັນລຸໄດ້ຕາມຕົວຊີ້ວັດແຜນການຄາດຄະເນ; ພ້ອມກັນນັ້ນ ພວກເຮົາກໍມີຄວາມຄາດຫວັງຈະໄດ້ຮັບການສະໜັບສະໜູນດ້ານທຶນຮອນ ຈາກ ຜູ້ມີສ່ວນກ່ຽວຂ້ອງພາກລັດ, ການປັບປຸງລາຄານໍ້າປະປາ, ການຫັນໜີ້ເງິນກູ້ຢືມ ທະນາຄານເອກະຊົນ ໃຫ້ເປັນທຶນສົມທົບຂອງແຂວງ, ການຊໍາລະຄ່ານໍ້າຂອງຜູ້ບໍລິໂພກ ໃຫ້ພວກເຮົານໍາເອົາຜົນກໍາໄລພຽງເລັກນ້ອຍ ມາປັບປຸງປະສິດທິພາບການບໍລິການ ແລະ ພັດທະນາວິສາຫະກິດໃຫ້ເປັນຕົວແບບ ໃຫ້ເທົ່າທຽມກັບວິສາຫະກິດຂະແໜງການອື່ນໃນແຂວງຈໍາປາສັກໄດ້.
ອີກຢ່າງໜື່ງ; ພວກເຮົາມີຄວາມເຊື່ອໝັ້ນວ່າ ບົດຮຽນໃນການສ້າງແຜນດໍາເນີນທຸລະກິດຂອງຄະນະປັບປຸງສ້າງແຜນດໍາເນີນທຸລະກິດ ໂດຍການມີສ່ວນຮ່ວມຂອງຂະແໜງການ ໂຍທາທິການ ແລະ ຂົນສົ່ງ ຈະສ້າງຄວາມເຂັ້ມແຂງດ້ານການພັດທະນາຊັບພະຍາກອນມະນຸດ ແລະສ້າງແຮງຈູງໃຈ ໃຫ້ພະນັກງານລັດວິສາຫະກິດພວກເຮົາໄດ້ເສີມສ້າງຄວາມອາດສາມາດໄດ້.
ທ້າຍສຸດ; ຕາງໜ້າພະນັກງານທັງໝົດ ຂອງລັດວິສາຫະກິດນ້ຳປະປາແຂວງຈຳປາສັກ ສະແດງຄວາມຂອບໃຈ ການຊ່ວຍເຫຼືອສ້າງແຜນດຳເນີນທຸລະກິດປີ 2019-2021 ສໍາເລັດຢ່າງຈົບງາມ.
